Sensa sentimèet

Sensa sentimènt

Che squalóor, che tristèza

pü gnàa 'n pìt de certèza.

 

"Compro oro e gioielli,

realizza i tuoi sogni più belli".

 

En de scatulìi 'n fónt al casèt

iló propri sota 'n panét,

lè restàat 'na cadenèla,

chèla de òor, dèla nona Stèla.

 

Al ghé l'eva regalada da moróos,

'l póor nono prüma da 'n’dà a spóos.

 

L'era 'ndàc' fìna en Francia

par 'mpienì 'mpóo la pansa.

 

La lauràat dì e nòc'

sóta l'acqua e al frec',

al pregava la Madóna

par tornàa dala sua dòna.

 

Al maiava scìola e paa sèch,

ridót dal laoràa coma 'n stech.

 

Finalmèet, èco dùu danéer

par sudisfàa i sóo penséer;

La crumpàat 'na cadenèla

par 'l sò amóor, la sua bèla.

 

Quanca l'è ruàat Natàal

al g'ha portàat 'l sò regàal.

 

Stà pora dòna la sè stimava

par ol sò òor ca al còll la portava.

 

Pö l'è ruàat ach ol tèep dèla guèra

'l sò òor l'era tütt chèl ca la ghera.

 

Adès ca tüt l'è finìit e lóor iè mòort

se fà pü gnaa 'n tòort,

àla svèlta se pö desfesciàs

dèla cadenèla sensa preocupàs.

 

En càmbi de quatro monedi

i pèrt l'onóor a'i eredi

Ciamèla pür felicità...

miga de sücür onestà.