Mì ol càa e li vachi
di Vittorio C. 25-07-2023
Mì ol càa e li vachi
L'ültem àn ca 'nsè 'ndàc' i'mùut ai Graséi l'era 'l 1960, ma descargàat e coli vachi e 'nsè ignüut 'nfò sündèl canàal de grónda par pò pasà gió da San Salvadù e ruàa al magènch de Zapèl.
Ala caśèra dèi Graséi lè rèstàat ol fórmai sóta sàal e chèl da raspàa e da giràa sü 'ndèli às par miga lagàl tacagió; iscé 'na dómàa, dopo ca ma viatfò li vachi èn pastüra ité ali Valeni, 'l mè pà 'l ma lagàat ilò mi e'l càa a cüràa li vachi e'l ma dìc':
"lagheli miga 'ndà vèrs la Crosèta gnè gió vèrs ol Fontanìi gnè 'n fò vérs la masù a Zapel, dopo rùi mi, fóo de bòt". La töc' sü e lè 'ndac' ai Graséi a vardàch réet al formai.
La giornada l'era amò una de chìl ca la ciamava còlt, 'n bèl suul, li vachi li girónzolava 'mpóo 'nsü, 'mpóo ilà e'mpóo 'nscià a maiascià la bèla èrba e mi li tegnevi sótöc', li cüntavi ach, iscé sevi sücüur cal 'nera miga ndàcià gnàa üna.
Ol tèep al pàsa e mi vardavi l'orolòc', lè li 10 pò lè scià li 11 e chèl otro gnàa bao, al ruava ca pü.
A nöov'àgn sè amò gióen ma quai cróos réet ai sentéer ievi già idüdi e iscé te cumìncet a fàndàa ol scèrvel da la part ca te ölaréset mai cal vés...
El vée 'mèet 'l sentéer cal ciapa sü, dalaià dol Liri sóta la Còsta, cal pasasü par ruàa ala Casèra dei Graséi, lè miga dei püsé bei a sè l'era sistemàat bée...
Magari lè derocàat, 'ntàat li uri li pasa le scià pasàat mèesdi e li vachi li cumincia a remàs scià gió 'nfónt, 'ndua ghè ol sentèer par ol Fontanìi, e se capìs ca li ghà sìit.
Mi èl càa 'ncerca de ubidìi ai órdegn dèl capo e üu a bagiàa e üu cola gianèta, li vachi li stà ilò 'mpóo a fadiga.
Ormai lè scià l'üna, ol sùul l'era sürìc' cal picava gió bèlebée, còlt da fa pùra e i tavàa i cumincia a lóor a ulìi sciüscia vargót e i se taca ali vachi. A chèl punto gnè la gianèta gnè 'l càa i ghè ruàa a fermà li vachi che a zómp li pasagió par 'ndàa a bìif.
Mi tüt trebülàat, 'mpóo 'nsürìit ghè sóo 'ndàc' réet e quanca ò pò idüut ca li bieva me sóo tranquilizàat 'mpóo ma 'l rèstava ol fàto cal pà 'l ruava ca pü.
Li vachi dopo vì büut li torna 'nréet pieni come öf a fadiga e finalmènt vedi cal rua a 'l pà.
Le coma vì tràc' gió 'n gèrlo de chi gréef piée de gràsa, al me se slargàat ol fiàat.
Io il cane e le mucche
L'ultimo anno che siamo andati sull'alpeggio Grasselli era il 1960, abbiamo demonticato e con le mucche siamo transitati sul canale di gronda per poi scendere da San Salvatore ed arrivare al maggengo di Zappello.
Alla casera dei Grasselli è rimasto il formaggio sotto sale e quello da pulire e voltare sulle assi per non lasciarlo aderire; così una mattina, dopo che abbiamo portato le mucche alla pastura delle Valene, mio padre mi ha lasciato con il cane a custodire le mucche raccomandandomi:
"non lasciarle andare verso la Crosèta né giù verso il Fontanii né verso la stalla a Zappello, dopo arrivo io, faccio in fretta". E se n'é andato ai Grasselli a sistemare il formaggio.
La giornata era una di quelle che chiamava caldo, un bel sole, le mucche gironzolavano un po' in su, un po' in là e in qua a brucare la bella erba ed io le tenevo d'occhio, le contavo anche, così ero sicuro che non ne fosse scappata nemmeno una.
Il tempo scorre e io guardavo l'orologio, sono le 10 poi arrivano le 11 e quell'altro non si vede, non arriva più.
A nove anni si è ancora giovani ma qualche croce lungo i sentieri le avevo già viste e così cominci a far andare il cervello dalla parte che non vorresti mai che andasse... Viene in mente il sentiero che sale, dall'altra sponda del fiume Livrio sotto la località Costa, e arriva alla Casera dei Grasselli, non è dei più belli anche se era sistemato bene... Magari è andato a rotoli giù per le rocce, intanto le ore passano e arriva mezzogiorno passato e le mucche cominciano a radunarsi giù in fondo, dove c'è il sentiero che porta al Fontanii, e si comprende che hanno sete.
Io e il cane cerchiamo di rispettare gli ordini del capo e uno ad abbaiare ed uno con il bastone, le mucche stanno lì ferme a fatica.
Oramai si è fatto l'una. il sole è su alto e batte parecchio, caldo da far paura e i tafani cominciano anche loro a voler succhiare qualcosa e si attaccano alle mucche. A quel punto né il bastone né il cane riescono a fermare le mucche che saltando si avviano per andare a bere.
Io tutto tribolato, un po' rattristato sono andato dietro e quando ho visto che bevevano mi sono tranquillizzato un poco ma restava il fatto che il padre non arrivava più.
Le mucche dopo aver bevuto tornavano indietro a fatica piene come un uovo e finalmente vedo arrivare anche mio padre.
È stato come aver tolto dalle spalle la gerla di quelle pesanti piena di letame, mi si è allargato il fiato.
